Graad 1 – Opedag 2013 of Inligtingsdag
Waar:            CVO – Skool Lichtenburg
Wanneer:   30 Augustus 2013
Tyd:  09 : 00   tot  11 : 00
Wie is welkom :  Kleuterskole in die omgewing

Tydens hierdie besonderse oggend word alle voornemende Gr. 1 – ouers van 2013 skriftelik uitgenooi om die verrigtinge by te woon. 

Gedurende die oggend stal die Skryfbehoefte – winkel , Kantoormeubels, benodighede uit en bied ʼn pakket aan met al die kleingoed se benodighede vir die “groot skool”.  Bybelprojekte , kunswerke en ander interessanthede asook die huidige Gr. 1’s  se boeke word uitgestal.  Ons eie Kleuterskool , Trapklippie , lewer ʼn klein opvoering.  Gr. 1 – 6 leerlinge sê van hulle Redenaarstoesprake , Kultuurfees – rympies asook Klavieroptredes om met ons talente en gawes te spog.  Mnr. Tom van Jaarsveld , ons hoof , deel inligting aangaande ons skool mee. Mev. M. Coetzee wissel ook ʼn paar gedagtes en wenke. 

Mnr. Hansie Theart praat namens die Opvoedingsraad.  Ouers is welkom om vrae te vra en ontmoet die personeel na die tyd met verversings.

Kuierdae waar die toekomstige gr. 1 – maats fisies kom kuier, vind op 2 en 8 Augustus 2013, by die skool self plaas.  Hulle kuier in die gr. 1 – klas, doen ʼn kunsaktiwiteit en word met eetgoed en ʼn geskenkie bederf. 

Foto’s word geneem en in vorm van ʼn boekmerkie vir elke kind saam huis toe gegee. Op die 23 Oktober 2013 kom Sonja Herholdt en “Tjokker” vir ʼn Geesbou – oggend waartydens al die belangstellende Kleuterskole heen genooi word, vir ʼn laaste kuier by die “Groen Skool” CVO – Skool Lichtenburg.

CVO Brandwag beskou elke dag as ‘n Opedag. Belangstellendes kan ons dus enige skooldag kontak of besoek. Ons hou wel jaarliks ‘n LENTEDAG waarop allerhande aktiwiteite aangebied word. Hierdie jaar vind dit plaas op 13 September 2013. Almal is dan welkom om ons te besoek en ons aktiwiteite te ondersteun.

 Vir meer inligting, kan die skool geskakel word by 072 272 2879

Hardekool Akademie vir CVO in Ellisras hou DV Saterdag 14 September 2013 opedag.

Die tema is van ‘n “Zero tot ‘n Hero”.
In ons midde skyn die son!
Die lewe is ‘n avontuur – kom beleef dit.

Teikengroepe:  3-6 jr, Gr 1’s en Gr 8’s.

DVD uittreksels van hoogtepunte word vertoon. Mini-prospektus word uitgedeel.

Keur van items:  voordrag, koor ens. sal optree.

Dr. Karel Botha praat oor skoolgereedheid. 

Speletjies, uitstallings en gesprekke met onderwysers sal plaasvind.

Skakel die skool vir meer inligting: 079 202 8999.

CVO Pretoria en CVO Marmer in Marble Hall is van die eerste skole in Suid-Afrika wat 7 jaar volle akkreditasie by Umalusi gekry het!

Standerton Akademie se Opedag vind DV Donderdag 8 Augustus 2013 vanaf 10:00 plaas.

Program:
10:00    Opening in die saal
             Skoolhoof spreek ouers toe:

•        Agtergrond van die skool
•        Kleuterskool
•        Laerskool

10:30 - 11:30  Ouers beweeg na die bepaalde afdelings (kleuterskool of laerskool)

Skakel 017 712 4885 vir meer inligting.

CVO Skool Pretoria in Lynnwoodweg verlenging hou DV Vrydag 26 Julie 2013 van 9:00 tot 11:00 opedag. Ouers sal deur die Skoolhoof en Opvoedingsraadslede verwelkom word en algemene inligting ontvang. Omdat dit 'n gewone skooldag is, kan besoekers onderwysers ontmoet, klasse besoek en die skool in aksie sien. Later die oggend kan besoekers ook die leerlinge se Entrepreneursdag ondersteun.

Skakel 083 633 9370 vir meer inligting.

CVO Marmer se bekendstellingsdag vir die Kleuterskool tot Graad 1 vind DV Vrydag 7 Junie 2013 vanaf 10:00 tot 12:00 plaas.

Vir navrae kan die skool geskakel word by 013 261 2477.

Tydens ‘n boeredag te Wolf’s Rock Lodge naby Groblersdal, wat deur Absa geborg was, het CVO Marmer ‘n Nonnetjie-uil bewaringsprojek bekendgestel met ‘n breedvoerige aanbieding deur Dr. Gerhard Verdoorn, bekende bewaringskundige in landboukringe. Dr. Verdoorn se kennis oor plaagbeheer is verstommend en sy passie en dryf ten behoewe van omgewingsbewaring is aansteeklik. Hy het in besonder ‘n bestuursplan vir die beheer van die Nagmuisplaag, wat verantwoordelik is vir groot skade aan gesaaides, bekendgestel en die rol van Nonnetjie-uile daarin uitgelig.

Die skool, waarvan bykans 70% van ons ouers in landbou- of in landbouverwante beroepe staan, het vroeër spontaan op besinning oor uitreiking na ons gemeenskap reageer en gekoppel aan ons strewe om ‘n bydrae in die plaaslike gemeenskap te lewer wat volhoubaar sal wees as nalatenskap vir ons kinders, besluit om erns te maak met die bewaring van die Nonnetjie-uil.

Die Nonnetjie-uil is die mens en die omgewing se vriend op meer as een terrein. Elke plaaskind en natuurliefhebber het al beleef hoe ‘n Nonnetjie-uil op die werf sy intrek neem, daar broei en almal het in die proses onwillekeurig lief geraak vir die voëlsoort. Die onderdrukking van die muisbevolking is ook primêr vir saaiboerdery en die Nonnetjie-uil is by uitstek die beste natuurlike plaagbeheermaatreël hiervoor.

‘n Nonnetjie-uil vreet in ‘n gemiddelde leeftyd meer as sesduisend muise. Geen mensgemaakte maatreël het die vermoë om so delikaat en selektief enige plaag te beheer nie. Die skril roep van die Nonnetjie-uil is ‘n gerusstellende geluid snags op enige werf, want dan weet ons iets werk om die delikate balans van plaagbeheer deur predasie op Godgegewe wyse onverstoord voort te sit, op Sy tyd, soos dit in die natuur hoort.

Om die uil-vriende egter op die werf te laat vestig en in veiligheid daar te laat broei, is daar ‘n behoorlike struktuur nodig waar ‘n uil-paar hul intrek kan neem. Hierdie kas moet aan  sekere basiese spesifikasies voldoen en korrek gemonteer word, ten einde ‘n suksesvolle uilbewaarder te kan wees. CVO Marmer het nou die oplossing vir enige persoon wat ‘n hart vir hierdie waardige saak het.  Hulle stel outentieke, handvervaardigde uilkaste beskikbaar teen R350 per eenheid. Daar kan ook voortaan bestellings vir uilkaste geplaas word deur die skoolkantoor te kontak by 013 261 2477, Mnr. George Barnard by 082 322 7471 of vir Mnr. Christo van Straaten by 082 749 7828.

Christo van Straaten

Marli Steenkamp van CVO Orania het deurgedring na die finaal van die VLVK-Tienerkok 2013!  Slegs 5 finaliste word gekies uit die wenners van 18 streke in die Kaapprovinsie.  Marli moet DV 17 April 2013 gaan kook in die Paarl.  Ons wens Marli hartlik geluk.  Baie sterkte!

Indien u belangstel om CVO Skool Brandwag te ondersteun kan u dit doen deur ‘n heerlike Gholfdag wat aangebied word.  Hierdie Gholfdag vind DV 25 April 2013 te Krugersdorp Gholfbaan plaas.  Kontak gerus vir Sid Mann (sid.kenmann@eject.co.za) of Paul Ras (paul@pipent.co.za) indien u ’n vierbal wil bespreek, ’n putjie wil borg of meer inligting wil hê.

Mev Ingrid Marais van CVO Vivo is deur die Vereniging vir Afrikaanse Wiskunde Onderwysers beloon met die V.A.W.-prys vir die uitnemende manier waarop sy die Bloemfonteinkongres vir Afrikaanse Wiskunde Onderwysers gereël het.  Die prys is ’n reis na Amerika.  Sy besoek die Universiteit van Georgia in Athens, Georgia en woon daarna die NCTM-kongres in Denver, Colorado by.

BCVO is baie trots en bevoorreg om mev. Marais in ons geledere te hê.

Die BCVO se Landswye Atletiek vind plaas DV 21/22 Maart 2013 te Sasolburg.  Al ons atlete is hard aan die oefen vir hierdie spoggeleentheid.  U word hartlik uitgenooi om hierdie besondere geleentheid by te woon. 

Akademie vir CVO Derby hou DV Dinsdag, 1 Mei 2013, hul jaarlikse Gholfdag by die Koster Gholfklub.  Indien u weet van persone wat borgskappe kan gee, donasies of pryse verskaf moet u asseblief vir CVO Derby laat weet.  U kan hulle skakel by 014 549 2018.  U kan ’n putjie borg vir R 500.00 of R 1000.00 wat u sal toelaat om ’n advertensie by hierdie betrokke putjie te plaas.  U kan kan ook 'n speler vir die dag borg vir R 180.00.

Skakel Akademie vir CVO Derby vir meer inligting by 014 549 2018.

BCVO se matrieks van 2012 het 'n 97 % slaagpersentasie behaal. Gedurende 2011 was dit 95%. Die 2012 – Gr.12 groep het 95 onderskeidings ingeoes.

Vir Lewensoriëntering was daar 24 onderskeidings, 13 vir Wiskunde Geletterdheid, 10 elk vir Afrikaans en Rekeningkunde en 7 vir Wiskunde.

Die volgende leerlinge het besonder goed presteer:

CVO Potgietersrus kon hierdie jaar spog met 5 skuts in die provinsiale span en 11 medaljes. Hulle het deelgeneem aan die skietkampioenskappe van die Suid-Afrikaanse Nasionale Skole Skutters Unie in Kaapstad.  

Willem Barnard het 'n Meesterstoekenning ontvang vir 1318 punte uit 'n moontlike 1600. In die Veer-afdeling het hy die goue medalje gekry vir 'n totaal van meer as 1280 punte. Hy het silwer medaljes gekry vir die 3P (drie posisies: lê, staan en kniel) en 10m Olimpiese staan. In die 0/21-afdeling, het hy algeheel tweede geëindig. In die Olimpiese staanskiet het hy tweede geëindig, 0.3 punte minder as die wenner. Hy spog met die hoogste enkeltelling van 10.8 uit 10.9 in al die kompetisies. Hierdie prestasies het vir Willem 'n plek in die SANSSU nasionale skietspan verseker.

Elizmay le Grange het in die 0/13-afdeling, 'n Skerpskutter- en Experttoekenning ontvang. Sy spog met die goue medalje in die 3P-afdeling en 10m Olimpiese Staanskiet. Elizmay het die 0/13 Veer-afdeling met 102 punte meer as haar teenstander, gewen. Sy spog ook met die silwermedalje vir 'n totaal van 1250 uit 1600 punte vir die groottotaal van die Veer-afdeling.

Zelda Genis het in die Veer-afdeling 'n Meester- en Experttoekenning gekry. Sy kry ook 'n silwer medalje in die afdeling vir haar 1250 uit 1600 punte.

Elzaan van der Merwe het 'n brons medalje in die Veer-afdeling verwerf. Sy kry ook 'n Skerpskutter- en Experttoekenning vir haar totaal van meer as 1200 punte.  

Marni van den Heever het in die Veer-afdeling 'n dubbele Junior skut toekenning ontvang vir haar 400 uit 600 punte.

CVO Potgietersrus se skuts kan raak skiet!

Louis Boshoff het die beste van al die Gr. 7-leerlinge in die land gevaar. Hy het ook die algehele vyfde plek in Noord-Transvaal verwerf. Louis is die enigste Gr. 7-leerling wat onder die eerste 100 leerlinge landswyd in die Gr. 7 – 9-fase is.

Suné Germishuys is in die tweede plek van al die Gr. 7-leerlinge en algeheel in die elfde plek.

Hartlik geluk aan hierdie twee leerlinge. Ons is trots op julle. Ons hoop daar is DV. volgende jaar meer CVO skole wat sal deelneem.  

Dit was Saterdag die prysuitdeling vir die GHA Gedigtekompetisie. Leerlinge en personeel wat deelgeneem het, het weer CVO se naam hoog gehou. BCVO word elke jaar gekomplimenteer met die hoë gehalte deelnemers en ons wil graag elke onderwyser, ouer en leerling wat deelgeneem het gelukwens, maar veral die wat pryse gewen het. BCVO is trots op julle!

Baie geluk aan die pryswenners:

Solis vir Christus

Dit is met groot dankbaarheid in ons harte dat Volkskool Brakpan die eerste wenner, in ses seisoene van Tienerzone, in die CVO bedeling het. Hier bied ons onderwys met ‘n verskil aan. Ons glo in God Drie-enig en daarom bied ons Christelike Gereformeerde onderwys aan al ons leerders. Hier is ook die volkseie vir ons belangrik en herdenk ons al die geskiedkundige dae sodat ons kinders ook aan hulle kinders ons eie geskiedenis kan oordra.

Zane Beswick, ‘n ster gebore om ontdek te word, het vanjaar by Volkskool Brakpan ingeskryf as ‘n skaam Graad 11 leerder. Gou het die personeel sy besondere God gegewe talent raakgesien en dit met die hulp van Mad Hatter Productions help ontwikkel. Zane het hoofrolle vertolk in die skool se revue en sy plek oop gesing in almal se harte.

Toe Anthonie Bougas van Tienerzone die skool kontak met hierdie fantastiese geleentheid, het Zane binne twee dae voorberei en ‘n plek in die finaal los gesing.

Dit is vir Volkskool Brakpan se personeel en leerlinge ‘n groot voorreg om vir Zane hier te hê as deel van ons groot span met ons Hemelse Vader aan die stuur.

Baie geluk Zane! Dank die Here elke dag vir die groot talent wat Hy vir jou gegee het en gebruik dit tot eer en uitbouing van sy groot Koninkryk.

Umalusi-sertifikate van Gr. 12-leerlinge van 2011 kan by die skool of instansie waar die leerlinge geskryf het afgehaal word.

RIAN VAN HEERDEN VAN RADIO JAKARANDA IS NOG ’n KEER SKULDIG!

Op 4 Januarie 2012 tydens die 7:00 nuusuitsending op Radio Jakaranda, is berig dat BCVO se Gr. 12-leerlinge van 2011 ’n 95 % slaagsyfer behaal het. Na die tyd het mnr. Rian van Heerden dit goedgevind om daarmee te spot. Hy het gesê dat dit nie vir ver regse kinders moeilik is om sulke goeie punte te behaal nie, want hulle moes net twee vrae beantwoord, nl.

“Wie is Hendrik French Verwoerd? Hy was Eerste Minister. Reg

Wie regeer die land? Kommuniste – as leerlinge dit reg gespel het, kry hulle ’n onderskeiding! Ag, siestog!”

Hierdie verkleinerende beledigende opmerkings kon nie daargelaat word nie. BCVO het ’n klag by Radio Jakaranda en die Uitsaaiklagtekommissie aanhangig gemaak. Mnr. Van Heerden se verweer was dat hy ’n satiriese grap gemaak het om mense aan die praat te kry. Ook dat die opmerking nie teen die leerlinge gemik is nie, maar teen die liggaam wat aan hulle onderwys verskaf. Dus die BCVO.

BCVO kon nie hierdie antwoord aanvaar nie en die saak is voor die Tribunaal gebring.

Die klag het 23 Februarie 2012 saam met o.a. die klag van die Nuwe Hoop Skool voor die tribunaal gedien.

Mnr. Rian van Heerden is skuldig bevind en opdrag gegee om verskoning aan te teken.

Dit is jammer dat nie mnr. Van Heerden of Radio Jakaranda tot nou toe enige poging aangewend het om self verskoning aan te teken nie. Daar is eerder verdere opmerkings oor die verhoor gemaak. Dit is vir ons tekenend van hulle gesindheid!

CVO Skool Pretoria, gestig op 27 Februarie 1992, vier in 2012 die skool se 20-jarige bestaan. Hierdie jaar gaan 'n feesjaar vir al die leerlinge wees, met verskeie inisiatiewe van die leerlinge, onderwysers en ouers regdeur die jaar. Die leerlinge het alreeds 'n "geesweek" ondervind waartydens verskillende kleredrag vir 'n hele week gedra kon word. Verder was daar Laerskool en Hoërskoolkampe, 'n JPF uitstappie en die Laerskool het 'n opvoering van Pippie Langkous bygewoon.

Vrydagaand, 11 Mei 2012, bied CVO Skool Pretoria 'n musiekkonsert aan met Karlien van Jaarsveld en ons hoop om heelwat besoekers te ontvang. Kom deel gerus in hierdie geleentheid en kuier van vroeg af saam.

Saterdag, 4 Augustus 2012, is die groot dag vir CVO Skool Pretoria se gedenkkarnaval en opedag. Hierdie dag beloof om heerlik te wees met verskeie stalletjies en uitstallings, kosstalletjies, kaskar renne van die leerlinge en ander uitdaagspanne, sewes uitdaagwedstryde vir rugby en netbal, springkastele en ook nog vele ander aktiwiteite. CVO Skool Pretoria ontvang graag by hierdie geleentheid belangstellendes, ondersteuners, oud-leerlinge, leerlinge, ouers en onderwysers waar daar tot laat gekuier gaan word.
 

MEDIAVERKLARING

BCVO het kennis geneem dat Umalusi ERCO se akkreditasie as eksamenliggaam teruggetrek het. Na wat verneem word win ERCO tans regsadvies in.

BCVO se Gr. 12-leerlinge van 2012 sal beslis ’n geakkrediteerde eindeksamen skryf. As dit nie deur ERCO kan wees nie, sal daar vir 2012 van die Staat se NSS-eksamen gebruik gemaak word. Onderhandelinge is reeds t.o.v. die hantering van die voorgeskrewe werke in Afrikaans en Engels aan die gang.

CVO skole bied onderrig van hoë gehalte aan en hierdie skole se deurlopende evaluering is betroubaar en geloofwaardig, dus sal die leerlinge nie benadeel word nie.

BCVO het ’n gebeurlikheidsfonds in die lewe geroep vir moontlike regsgedinge wat uit besluite van Umalusi kan voortvloei. Die bankbesonderhede sal gekommunikeer word sodra dit gefinaliseer is. Intussen kan die Uitvoerende Hoof van BCVO by 0718961323 of hub@bcvo.co.za vir meer inligting gekontak word.

GR. 12 UITSLAE VAN BCVO-KANDIDATE VAN 2011

BCVO se Gr. 12-kandidate van 2011 het ’n 95 % slaagsyfer behaal. 77 % van al ons kandidate kan verder gaan studeer.

Ons het twee kandidate wat elk sewe onderskeidings behaal het, naamlik: Hannes van Wyk van CVO Skool Pretoria en Hanneke Strumpher van CVO Carolina.

Tussen die 187 kandidate wat in 2011 die NSS-eksamen afgelê het, het hulle 133 onderskeidings ingeoes.

 BCVO is tevrede met die afgelope ERCO eksamen en is oortuig dat vraestelle van ’n hoë standaard was. Al die vraestelle is deur eksterne moderatore van Umalusi goedgekeur. Volgens verklarings is kandidate van ERCO se jaarpunte nie in berekening gebring nie omdat van die jaarpunte van van die instansies nie geloofwaardig was nie. Dit lyk nie of dit BCVO-kandidate enigsins benadeel het nie. CVO Skole se jaarpunte word gemodereer op verskillende vlakke en tye en daarom stem dit grotendeels ooreen met ’n kandidaat se eksamenpunte. Daarom kan ons glo dat kandidate nie benadeel is nie.

Die CVO Zoutpansberg, Louis Trichardt, het op 31 Mei 2011 tydens hulle Republiekdagvieringe, hul skoolvlag onthul. Dit was 'n baie spesiale dag, nie net in die geskiedenis van ons volk nie, maar ook in die skool se geskiedenis.

Die skool is in 1998 gestig en het tans 80 leerlinge en 15 onderwysers. Die skoolwapen is op die vlag gedruk en die kleure van die wapen, is herhaal in die vlag. Dit was voorwaar 'n trotse dag in die geskiedenis van die CVO Zoutpansberg. 

Die volgende persone is tot die BCVO Direksie verkies:

Ds. Willem van Schalkwyk - Voorsitter
Ondervoorsitter: Renier Boshoff
Finansies:Renier Boshoff
Bemarking:George Bester
Sport:Wouter Scholtz
Kultuur:Theuns de Wet
Onderrig:Boet Groenewald

Streeksdirekteure:
Sentraal: Herman Smith
Oos-Transvaal: Dawie Aucamp
Noord-Transvaal: Renier Boshoff
Noordwes: George Bester
Vrystaat: Hannes Myburgh
Noord-Kaap: Hannes du Preez

Brand Skade by CVO Skool Potgietersrus

Die skool doen hiermee 'n beroep vir hulp vir die vervanging van verliese tydens die afbrand van die skool se ouditorium, administratiewe kantore en stoorkamers op 30 Januarie 2011.

Hierdie fasiliteite was gevestig met hulp van donateurs en harde werk van ouers, personeel en kinders, dit is verstaanbaar dat almal emosioneel verslae was oor die ramp.

Met ongeloof het ouers, kinders, onderwysers en vriende van die skool Sondagoggend op die toneel gearriveer, die totale verwoesting van die skool se trots het almal verslae met swaar harte en hartseer die verwoesting gade geslaan. Ouers en vriende van die skool het die hele Sondag nog die smeulende pale en gras geblus. Die ontstaan van die vuur is nog nie bekend nie en forensiese ondersoeke is nog in proses.

Die vuur is ontdek deur die sekuriteitsdienste wat 'n alarm sein op die terrein ondersoek het en die nooddienste gekontak het, wat baie vinnig op die terrein was Sondagoggend, ongeveer 01h30.

Weens intense hitte en die gevaar van intuimeling van die struktuur, kon net 'n klavier, podium en 'n paar stoele gered word. Die gebou het die ouditorium, administratiewe kantore, skoolhoof kantore, stoorkamers en kombuis gehuisves. Onderrigmateriaal, sporttoerusting, administratiewe-toerustinq, dokumentasie, gedenkwaardighede van die skool, kombuistoerusting, ouditoriurntoerusting en klanktoerusting ens. is totaal verlore in die brand.

Ons is baie dankbaar dat ons klaskamers nie in die slag gebly het nie en met 'n paar orde-reëlings kon die skool Maandag normaal voortgaan.

Die skool sal dankbaar wees vir enige donasies wat maatskappye en persone mee kan help, asook die verspreiding van die hulp-versoek na persone en maatskappye wat u dink hulp sal verleen met die groot verlies. Daar is reeds 'n hulpfonds vir die skool gestig. CVO Skool Brand Fonds ABSA bank rekening no: 9257086359 Tak kode 33 43 48 Tipe rekening: Spaar Kontak Besonderhede Tel: 015 491 6526 Faks: 015 491 3444 e-pos: cvopprus@lantic.net

By voorbaat dank.

Die jaarlikse BCVO Glansgeleentheid is Saterdag 8 Januarie 2011 gehou. CVO leerlinge wat die beste in vakke presteer het, het tydens die geleentheid erkenning gekry.

Die beste presteerder is Petra Legemaat van CVO Skool Pretoria. Sy het die BCVO-trofee gewen.

Carl le Roux van CVO Lichtenburg is tweede en Hendrik Terblanche van CVO Gromar in Groblersdal is derde. Hierdie drie leerlinge deel ook die Dinamika Makelaarstrofee vir die hoogste punt in Wiskunde.

Petra Legemaat het ook die GHA-trofee vir die hoogste punt in Afrikaans Moedertaal, Wally Granttrofee vir Fisiese Wetenskap en Treoc.comtrofee vir Rekeningkunde gekry. Treoc.com het ook 'n seminaar en twee trusts ter waarde van R10 000 aan Petra geskenk. Sy het verder ook sertifikate gekry vir die hoogste punt in Wiskunde Vraestel 3 en Christelike Lewensorientering.

Hendrik Terblanche van Gromar het ook die trofee vir die hoogste punt in Engels Eerste Addisionele Taal, Klydontrofee vir Fisiese Wetenskap gekry en 'n sertifikaat vir die hoogste punt in Inligtingstegnologie.

Zelandri du Toit van CVO Lichtenburg het die trofee gekry vir die hoogste punt in Lewenswetenskap.

Veronica Bauermeister het die TLU-trofee gekry vir die hoogste punt in Landboubestuurspraktyk.

Cassien Harmsen van CVO Skool Pretoria het die TGIS-trofee vir die hoogste punt in Geografie gekry. TGIS het ook 'n padvinder (GPS) en tjek aan Cassien gegee.

Leona Venter van CVO Zoutpansberg en Chavaughn Steenkamp van CVO Gromar deel die Bravolandtrofee vir die hoogste punt in Rekenaartoepassingstegnologie.

Christiaan Jansen van CVO Skool Potgietersrus het die CVO Skool Potgietersrustrofee vir die hoogste punt in Gasvryheidstudie gekry.

Hendrik Esterhuizen van CVO Eendrag in Jan Kempdorp het die Solidariteittrofee vir die hoogste punt in Ingenieursgrafika en Ontwerp gekry.

Willem van Nieuwkoop van CVO Skool Pretoria het die Solidariteittrofee vir die hoogste punt in Elektriese Tegnologie gekry.

BCVO is baie trots op hierdie leerlinge, maar ook op al die ander leerlinge wat presteer het. Ons is ook dankbaar dat daar organisasies is wat bereid is om trofee en ander skenkings te maak.

BCVO Skole het hierdie jaar 'n 97% slaagsyfer behaal. Die meeste skole het weereens 100% slaagsyfers gekry.

Die leerlinge wat die beste binne BCVO presteer het, is:
Petra Legemaat van CVO Skool Pretoria,
Carl le Roux van CVO Lichtenburg en
Hendrik Terblanche van CVO Gromar.

Die beste presteerders in onderskeie vakke, asook bogenoemde drie leerlinge sal DV Saterdag tydens die jaarlikse BCVO Glansgeleentheid erkenning kry. Ons is baie dankbaar dat ons leerlinge so goed gevaar het en wil hulle, hulle ouers, onderwysers en skole gelukwens met die prestasies. Ons is trots op ons leerlinge!

GHA GEDIGTE-KOMPETISIE

Ope Afdeling Kategorie C (Bosoorlog) Naaswenner: Marinette de Bruin (CVO Pretoria - Onderwyseres) met gedig: Meer as dertig jaar...

Kategorie F (Sonnet en ander digvorme): Carine Joubert Gr. 10 van CVO Pretoria het hier 'n sonnet Kitaarsonnet ingeskryf waarmee sy tweede gekom het.

Laerskool Afdeling (Natuur). Algehele Wenner: Anja Meyer (CVO Potgietersrus) met gedig: Bienkie van die stad. Interessant dat daar van CVO Potgietersrus 20 laerskool- en 8 hoërskoolkinders ingeskryf het.

Ander CVO-leerlinge wie se gedigte gepubliseer is, is in Stemme uit die Suiderland V: Carla van Wyk – CVO Potgietersrus
Carlo Smith - CVO Potgietersrus
Lilly Labuschagne - CVO Potgietersrus
Dioné Cronjé - CVO Potgietersrus
Anja Meyer - CVO Potgietersrus
Somarie Derksen - CVO Potgietersrus
Yvonne Struwig - CVO Potgietersrus
Suné Els - CVO Potgietersrus
Karlien Trollip – CVO Lichtenburg

Die beoordelaars het gesê dat die standaard van CVO-leerlinge opmerklik uitgestaan het. Ons is opreg trots op ons leerlinge!

Ondersteuningsfonds vir behoeftige CVO-leerders:

Die stigting van ’n fonds om behoeftige leerders aan CVO-skole in die sentrale streek van die land te ondersteun, bekend as die Trap der Jeugd Trustfonds, is pas gefinaliseer en in werking gestel. Die fonds is beskikbaar vir enige leerling aan een van die ses geregistreerde CVO-skole in die sentrale streek, nl. dié te Bethlehem, Bloemfontein, Excelsior, Orania, Heilbron en Vierfontein.

Dit is egter ook beskikbaar vir enige leerder wat kwalifiseer om ’n CVO-skool by te woon, maar nie oor die nodige fondse beskik nie.

Die Trap der Jeugdfonds is volkome afhanklik van geldelike skenkings sowel as skenkings in natura uit die publiek. Vir hierdie doel is enige welwillende persoon of instansie welkom om ’n bydrae te maak.

Skakel Hannes Myburgh by 082 852 8843 o f (058) 852 2781 of hannes@welgeluk.co.za. Bydraes kan ook geoormerk word vir enige van die ses skole of vir ’n spesifieke leerder/s of spesifieke doelstellings. Die bankbesonderhede is voos volg: Trap der Jeugd Trustfonds, Standard Bank, Brandwag, Bloemfontein, rekeningnr: 140 377 913.

BCVO se Nasionale 0/13-rugbyspan wat tydens die Winterspele gekies is, het aan 'n toernooi in Frankryk deelgeneem. Hulle het nie net die toernooi gewen nie, maar ook al agt hulle wedstryde en geen punte kon teen hulle aangeteken word nie.

Stephan Fick is hulle trotse afrigter. Hulle word DV Woensdag 4 November 2009 om 6:45 in Suid-Afrika terug verwag. Ons is trots op ons 0/13-rugbyspelers!

Loria Hayes (matriek CVO Pretoria, 2003), is op die oomblik 'n uitruilstudent by die Universiteit van Antwerp in Antwerp, België vir die finale semester van haar B Com(regte)LLB studies.

Hier is 'n skakel van 'n TV-program, van die "Campus TV" van die ATV, streekstelevisie van België, waarin sy verskyn. http://www.atv.be/v3/popups/programarchive.aspx?id=1642 (laai eers so halfpad af voordat jy kyk)

Loria is na die onderhoud deur die TV-span genader om vir hulle onderhoude in Afrikaans te doen wat dan uitgesaai word. Haar eerste onderhoud was met 'n mediese professor wat navorsing doen oor gewigloosheid in die ruimte.

Volgens Loria is die Belge (Vlaaminge) met wie sy te doen kry in vervoering oor Afrikaans. Dit wys net dat ons kinders nie geisoleerd is nie, al kom hulle uit klein skole. Hulle kan hulself handhaaf ook internasionaal.

Studente aan die Ingenieursfakulteit van Pretoria moes iets nuut ontwerp, maak en bemark. Ongeveer 800 studente het in groepe deelgeneem, wat ongeveer 200 projekte beteken.

Edwin van Aarde (CVO Pretoria) en Andre Malan (CVO Brakpan)se groep het 'n algehele derde plek behaal.

Martin van Nieuwkoop (CVO Pretoria)en sy groep het 'n vierde plek behaal.

Hartlik geluk aan hierdie oudleerlinge. Ons is trots op julle! Dit is 'n bewys dat CVO leerlinge uitstyg, ook na skool.

Hartlik geluk aan die volgende leerlinge wie se gedigte gekies is vir publikasie in digbundel "Die Wonder van Afrikaans" wat deur die GHA uitgegee word:

Anja Meyer - Regstellende aksie, CVO Potgietersrus,
Marcelle Potgieter - Eksamen, CVO Marmer,
Delene van Wyk - Verstaan ons? en Wat?, CVO Vivo,
Coba Cilliers - Hoekom, CVO Waterberg,
Mardonet Coetzee - Ons land en Egskeiding, CVO Pretoria,
Nerina Engelbrecht - Nee!, CVO Waterberg,
Quintus Engelbrecht - Die ander donker en Bang vir more, CVO Waterberg,
Angelique le Grange - Hoop, CVO Potgietersrus,
Andrea Lexow - Aan jou, CVO Pretoria,
Betsie Olivier - Mes teen die keel, CVO Kalahari,
Megan Pienaar - Eksamenkoors, CVO Waterberg,
Karlien Trollip - Verlore droom, CVO Lichtenburg.

Baie dankie ook aan toegewyde personeel en ouers wat leerlinge motiveer om deel te neem.

Lee-Ann Olivier, 'n leerling van CVO Skool Pretoria het 'n gedig "Last Breath" ingeskryf vir 'n kompetisie van die "Poetry Institute of Africa". Die gedig is een van die gedigte wat gekies is vir publisering in "Resolute Rendition".

Die gedig kan gelees word onder die dokumente wat op die webwerf gelaai is. Ons is trots op Lee-Ann.